Munu sjúkrabílar komast að Hátæknisjúkrahúsinu við Hringbraut á mestu umferðartímum?

Ég er alveg gáttuð yfir því að það skuli eiga að fara að ráðast í að byggja það sem var áður kallað Hátæknisjúkrahús, og það á þessum stað, það er við Hringbrautina.   Nú er það ekki kallað lengur hátæknisjúkrahús, heldur nýi Landspítalinn, þar sem það hefur komið í ljós að við erum með góðan hátæknispítala, það er aðstaðan sem er verið aðallega að bæta, það er einbýli og sérsnyrtingu.  

Þessi staðsetning, það er við Hringbraut,  finnst mér alveg fráleit.  Umferðin þarna er næg fyrir.  Alltaf er öllu beint á einn stað.  Það er t.d. búið að bæta við umferðina, til Háskólans í Reykjavík.   Síðan á að bæta við, allri bílaumferð sem er nú til gamla Borgarspítalans í Fossvoginum, en þar er nú verið að biðja um fleiri bílastæði.  Hvernig eiga sjúkrabílar að komast að, t.d. á morgnanna og á mestu annatímum, þegar umferðin er nánast stopp.  Væri ekki betra að dreifa umferðinni svolítið og þá í báðar áttir.   Umferðin þarna myndi einnig valda loftmengun og trufla hvíld sjúklinga. 

Nýju bygingarnar þurfa að vera lágreistari og dreifðari vegna þessarar staðseningar.  Þær munu ná næstum því frá Snorrabraut og að Hljómskálagarðinum, sunnan við gamalgróið íbúahverfi (Laufásvegur, Smáragata, Sóleyjargata).  

Viljum við þetta?  Höfum við frekar efni á að reka þennan nýja Spítala, þegar við þurfum núna að skera alls staðar niður í heilbrigðiskerfinu?  Eða á hann að standa tómur?

 Þóra Andrésdóttir

 

 

 

 

 

Hagsmunir togast á við Hringbraut

Hátæknisjúkrahús? Við Hringbraut?

Áætlaður kostnaður við nýbyggingu Landspítalans er um 33 milljarðar króna á verðlagi í mars 2009. 

Er  þetta rétti tíminn núna, til að byggja hátæknisjúkrahús, þegar verið er að skera alls staðar niður í heilbrigðiskerfinu?  

Ég er hissa á að það skuli vera komið svona langt með hátæknisjúkrahúsið þrátt fyrir kreppu, og staðsetningin finnst mér alveg fráleit.   Umferð og aðgengi að sjúkrahúsinu verður að vera gott, þó ekki væri nema til að sjúkrabílar komist auðveldlega að.   Svo finnst mér alveg synd að leyfa ekki gamla spítalanum að njóta sín að fullu, sem er ein af fallegustu byggingum borgarinnar.  Mér finnst hátæknisjúkrahúsið alls ekki mega rísa við Hringbrautina og reyndar spurning hvort það sé tímabært að reisa það yfirleitt.  Verður hægt að reka það?

Er auðveldara að reka hátæknisjúkrahús?  Er betra að loka deildum þar til að spara, eins og gert hefur verið á gamla spítalanum og láta sjúklinga liggja á göngum þess?   Eða á það kannski að standa tómt?   Ekki þarf færra starfsfólk þar ef allir verða á einbýli. En eins og kemur fram á vef Nýs Háskólasjúkrahúss, segir einn læknir á LSH / 08. júní 2006:

Mér vitanlega stendur ekki til að bæta við nokkurri nýrri hátækniþjónustu í hinni nýju byggingu, hins vegar á að stórbæta aðstöðu sjúklinga og aðstandenda. Útrýma á gangainnlögnum og koma á þeirri sjálfsögðu reglu að veikir einstaklingar vistist á einbýli. 

Auðvitað væri það gott að geta boðið sjúklingum upp á einbýli.   En einnig gamla fólkinu, sem hefur verið boðið upp á það á hjúkrunarheimilum að vera með öðrum í herbergi, jafnvel í mörg ár en ekki tímabundið eins og spítalavist er oftast.  

Aðstæður hafa breyst, hefur Ríki og Borg ekki tekið eftir því?

Þegar ákvörðun um byggingu hátæknisjúkrahúss var tekin, voru svokallaðir Símapeningar sem áttu fara í það.   Hvað varð um þá?  Það var synd að þegar Símapeningarnir voru til (ef þeir voru þá til) og nóg pláss til að byggja við Borgarspítalann, þar sem ráðgjafar höfðu ráðlagt að byggja, var tækifærið ekki notað.   Þar hefði verið hægt að byggja meira upp á við og auðveldara að tengja byggingarnar saman.  Nú er það ekki hægt lengur, þar sem plássið þar er ekki lengur til staðar, þ.s. aðrir hafa byggt þar.   Hverjir réðu því?  

Það má skoða það núna, að reisa hátæknisjúkrahús á einum stað í framtíðinni, þegar við höfum efni á því að reka það.   En þá tel ég að Hringbrautin sé engan veginn rétta staðsetningin.   Það að hafa Háskóla Íslands og Háskólann í Reykjavík nálægt, finnst mér eiginlega engin rök, hverju skiptir það?   Er það fyrir prófessorana?

Það er mér algjörlega óskiljanlegt, að ætla að troða þessari stóru og víðáttumikilli byggingu þarna við Hringbrautina,  Þessi staðsetning veldur því að byggingin verður að vera lágreistari og dreifðari en t.d. í Fossvoginum.  Ég sé fyrir mér alla þessa ganga og ranghala, þar sem starfsfólk þarf að hlaupa með sjúklinga á milli deilda, það hefur sýnt sig að geta jafnvel valdið dauða sjúklings.  Nýjustu byggingarnar myndu ná næstum því frá Snorrabraut og að Njarðargötu.  Þær sem fyrir eru afmarkast af Hringbraut, Barónsstíg, Eiríksgötu og Snorrabraut.   Umferðin þarna í kring er nógu erfið og mikil, þó ekki bætist við umferðin frá Borgarspítalanum líka.  Þar er núna verið að biðja um fleiri bílastæði.  Bílaumferð vegna Háskólans í Reykjavík hefur þegar bæst við.   Alltaf er öllu beint á einn stað, eða sett í sömu körfuna.  Væri ekki betra að dreifa umferðinni svolítið og þá í báðar áttir.  Þessi staðsetning myndi kalla á Öskjuhlíðargöng.  Hún gæti jafnvel kallað á fleiri vegaframkvæmdir, stokka og Holtsgöng.  Eitthvað kostar þetta allt saman, og erum við tilbúin að fórna meiru af Öskjuhlíðinni.   Nauthólsvegur kostaði um 480 milljónir króna, og fór ekki í umhverfismat.  Á að halda áfram og þjösnast áfram með hluti án þess að allt sé upp á borðum.  Sumar byggingar sem fyrir eru þurfa að víkja, t.d. Umferðarmiðstöðin og þá þarf nýja annars staðar, er það nýja samgöngumiðstöðin?  Eru til peningar fyrir þessu öllu?  Það er ekki lengur 2007.  Komum í veg fyrir stórt umhverfisslys, þetta er óafturkræft.  Við erum með ágætis hátæknisjúkrahús, nýbúið að bæta við gjörgæsluna í gamla spítalanum, og verið að bæta við bráðamóttökuna og endurkomuna í Fossvoginum.     

 Hvernig væri að byggja hátæknisjúkrahús, þegar og ef að því kemur, í  Ártúnshöfða (við Björgun), eins og Guðrún Bryndís Karlsdóttir verkfræðingur og sjúkraliði stakk upp á í Silfri Egils þann 8. nóvember 2009 (hægt að sjá á Youtube).   Þá væri það í útjaðri borgar eins og Landsspítalinn var 1930, þegar hann var byggður.   Aðgengi gott, líka frá landsbyggðinni, og umferðarflæði yrði í báðar áttir.  Stundum er betra að byggja nýtt frá grunni, heldur en að nýta og aðlaga gömlu að breyttri aðstöðu, og brjóta niður.   Þá væri hægt að byggja hærra upp og nýta betur byggingarreitinn og möguleiki á að stækka við seinna ef þörf verður á.   

Er það forsvaranlegt að reisa hátæknisjúkrahús, sem er sjúkrahús allra landsmanna, þar sem aðgengi er erfitt?  Það er ekki nóg að hafa flugvöll nálægt, ef umferðin er þung.  Sjúkrabílar, líka af landsbyggðinni þurfa að komast auðveldlega að.  Vilja borgarbúar fórna þessu stóra landssvæði undir svona stórar byggingar, við hliðina á Hljómskálagarðinum og sunnan við gamalgróið íbúahverfi?   Sjúkrahúsið  verður endanlega á við þrjár flugstöðvar á þessu svæði.   Það myndi taka á móti t.d. útlendingum þegar þeir koma frá Keflavík inn í miðbæinn, og öðrum náttúrulega líka.  Flýtum okkur hægt og hugsum málið vel og alla leið til enda.  Ekki væri gaman, ef framkvæmdir á þessu svæði tæki langan tíma og/eða stæðu lengi ónotaðar vegna fjárskorts, manneklu og fleira.  Þetta eru miklir óvissutímar núna. Þetta er kannski atvinnuskapandi fyrir einhverja, en það væri það líka ef sjúkrahúsið væri á öðrum stað, þá væri meiri tími til stefnu og ekki framtíð miðbæjarins í húfi.  En væri ekki betra að ráðast í fleiri smærri verkefni, sem væru ekki eins dýr, fleiri nytu góðs af og eru meira aðkallandi, þ.e.a.s. ef þessir peningar liggja á lausu? 

Það er verið að tala um 33 milljarða króna og að gamli Borgarspítalinn yrði seldur fyrir 3 milljarða upp í.   Mér skilst að fjöldi lífeyrissjóða hafa boðist til að kosta verkið og vilja fá til baka greiðsur í formi húsaleigu.

Þóra Andrésdóttir

310757-6329

Hætta morgunleikfimi á rúv, hvað sparast?

Eins og alltaf, er ráðist á garðinn þar sem hann er lægstur.  Jafnvel þó það sparist bara nokkrir aurar, en krónum kastað á glæ í staðinn.  Það getur varla hafa kostað mikið þessi stutti morgunleikfimistími, sem er svo mikilvægur fyrir margt fólk.  Margt af þessu fólki er eldra fólk og öryrkjar sem eiga erfitt með að komast í sjúkraþjálfun, líkamsrækt eða íþróttahús, eða hefur ekki efni á því.  Hreyfingin er þeim lífsnauðsynleg og mosrgunleikfimin hefur haldið mörgum gangandi.  Þetta getur jafnvel orðið til þess að fleira fólk leggst inn á spítala, sem er miklu dýrara fyrir þjóðfélagið og hefði kannski verið hægt að koma í veg fyrir með þessari nauðsynlegu hreyfingu sem morgunleikfimin sá fólkinu fyrir.   Gunnar Guðmundsson lungnalæknir segir þetta mikil mistök.  Hann telur að af því verði enginn sparnaður fyrir þjóðfélagið því af þessu hljótist aukinn kostnaður fyrir heilbrigðiskerfið.    Og ég tala nú ekki um hvað mikið er tekið af fólkinu og veldur þeim óþægindum og jafnvel sjúkrahúslegu.

Áfengi í matvöruverslanir, er ekki komið nóg af frjálsræði?

Mér blöskrar að Sigurður Kári skuli leggja fram tillögu á Alþingi um að selja áfengi í matvöruverslunum, enn einu sinni, og leyfa áfengisauglýsingar.  Er ekki eitthvað annað mikilvægara að gera á Alþingi í dag.  Að hann skuli gera það á þessum erfiðu tímum, þegar varað er við að fólk leiti í áfengi í sínum þrengingum og áhyggjum.  Og til að trompa það, gerði hann það á svipuðum tíma og forvarnarvikan og forvarnardagurinn var.  Þegar verið var að ítreka það við unglingana að hvert ár skipti máli, að það borgi sig að bíða með það að byrja að drekka.  Til þess eru eyddir peningar í heilsíðuauglýsingar, til að hafa áhrif á unglingana okkar til góðs.  Auglýsingar hafa nefnilega áhrif.  Á svo að leyfa að auglýsa áfengi, til að gera þetta að engu og hvetja þá til drykkju?  Í sjónvarpsauglýsingum undanfarið sem eru dulbúnar bjóragulýsingar, er höfðað mest til unga fólksins.  Það er staðreynd, að aukið aðgengi veldur aukinni neyslu.  Það eru unglingar sem afgreiða í flestum matvöruverslunum.  Það getur verið erfitt fyrir þá að neita vinum sínum um afgreiðslu.  Það hefur verið efitt að fylgja eftir banni við kaup á sígarettum yngri en 18 ára, og það er farið að fela tóbakið.  Það verður mjög erfitt að fylgja því eftir að afgreiða áfengi aðeins yfir tvítugu.  Afgreiðslufólki gæti jafnvel verið hótað, t.d. af fíklum.  Ég spyr: Er svo erfitt að fara í áfengisverslanir sem eru orðnar víða og í flestum stórmörkuðum og opnunartíminn orðinn rýmri?  Erum við tilbúin til að taka afleiðingum frjálsræðisins?  Eða verður það eins og með einkabankana, ekkert eftirlit og algjört hrun.  Margir einstaklingar verða byrði á þjóðfélaginu, þar sem þeir verða ekki lengur nýtir þjóðfélagsþegnar.  Það kostar þjóðfélagið mikið og veldur öllum í kringum þá vanlíðan og áhyggjum.  Hver þekkir ekki það böl sem fylgir ofneyslu áfengis- og vímuefna?  Er þetta virkilega það sem við viljum?  Er okkur alveg sama um náungann?  Hugsum bara um okkur sjálf, að það sé auðveldara fyrir mig að nálgast áfengi þegar mér hentar?  Get ég ekki bara verið án áfengis, ef ég hef ekki gert ráð fyrir því fyrirfram og búin að kaupa það?   Ef ekki,  þá er ég á hættulegri braut !!!  Óvæntir gestir geta líka örugglega verið án áfengis, vonandi, ef ekki,  ætti maður ekki að bjóða þeim það !!!